【馮仁昭四圍超】周慧敏古巨基切磋　篤旺波樓

【蘋果日報】倪震同友人合資嘅桌球室再開分店，噚日喺油麻地搞開幕活動，老婆周慧敏（Vivian）、古巨基、劉兆銘同郭秀雲嚟撐場。基仔仲同Vivian進行友誼賽，話要同對方賭啤酒，倪震即刻護妻：「我太太唔飲酒，等我嚟頂。」基仔即笑言：「真係為愛而戰。」
着宮廷裝
新店樓上嘅一個婚宴場地掛咗Vivian兩公婆嘅結婚相，嘉賓要求佢哋擺番同一甫士影相，但佢哋拒絕，倪震話：「希望結婚十周年後再返嚟呢度慶祝。」兩公婆受訪時講到下月5號就係結婚九周年，倪震話等十周年會請多啲朋友慶祝，至於會唔會再影結婚相，佢就話：「我離開咗演藝圈一段時間，對住鏡頭比較生硬，唔再係我強項。」
Vivian話近日忙為下月嘅演唱會排練：「二十幾號就要表演，當日需要練習，同埋我哋好少喺特別節日慶祝，反而平時會畀小驚喜大家。」問到倪震會唔會喺演唱會送驚喜？Vivian話：「要問總監古巨基。」基仔笑言倪震若上台起碼要唱歌，咁會唔會叫倪震或Vivian着番宮廷裝？基仔話：「大家好喜歡Vivian呢個造型，我有游說過佢，佢反應係唔抗拒嘅。」
撰文：馮仁昭