黃心美豪邁睡姿　當眾瞓床

【蘋果日報】黃心美日前喺中環做完嘢，冇約男友拍拖行街，反而一個人走咗去上環一間百貨公司濕平。最初佢漫無目的邊行邊玩電話，之後去咗賣床上用品嘅地方睇床褥。雖然佢係宅男女神，不過實際性格好豪爽，所以唔理三七二十一即刻當場試瞓床褥，瞓完一張又一張，一啲避忌都冇慢慢試，而售貨員亦好有耐性咁講解每一張床褥有乜功能。
撳電話唔睇路
黃心美試咗兩張床褥，對其中一張價值13,000元左右嘅相當有興趣。不過試瞓咗兩次之後，佢都係要再三考慮，跟住佢又邊行邊撳電話，唔知係咪問緊男友意見呢？行到去扶手電梯時，佢一個唔留神失平衡跌一跌，好彩最後有驚無險。臨走之前，佢行去化妝品部再睇吓嘢，但似乎唔係好啱心水，空手離開。
事後問番黃心美係咪諗住同男友同居，所以去試床褥？佢話：「我冇諗過同居喎，只係因為我嘅睡眠質素好差，加上本身張床又瞓咗好多年，所以咪諗住換過張好啲。如果每日瞓到八個鐘，即係話人生有三分一嘅時間喺張床上，大拿拿拎五位數字買張床褥，梗係試真啲！」