嘉玲欽點吳肇軒譜師生戀「我鍾意呀」

【蘋果日報】【《蘋果》專訪】劉嘉玲首度擔任監製兼主演電影《以青春的名義》，片中飾演代課老師的她與學生吳肇軒發生一段師生戀，戲外嘉玲大讚吳肇軒眼神帶點憂鬱，有一種失落感，猶如年輕時的梁朝偉。雖然道德觀念排除師生戀，但嘉玲笑言喜歡這題材，指年輕人在情竇初開時，大多數會對異性老師產生幻想。
採訪：蘇美怡
劉嘉玲為主演電影《以青春的名義》親自挑選吳肇軒演出男主角，該片獲第二屆「首部劇情電影計劃」資助，更成為香港亞洲電影節的開幕電影及競賽電影之一，其他演員還有謝君豪及余香凝等。嘉玲與吳肇軒日前於金鐘接受訪問，嘉玲表示：「佢有與生俱來嘅失落，眼神裏面有啲憂鬱，有啲似以前嘅梁朝偉，好易令到女仔想保護佢。戲中角色講佢細個媽咪離開咗佢，所以一路期望媽咪會返嚟，好啱佢做。」吳肇軒直言因為嘉玲擔任該片監製，拉攏了好多前輩幫手，他說：「鏡頭技巧我學到好多，嘉玲姐亦指導我好多，當然導演都有。」
不計酬勞
莊文強促成今次合作，並將該片推薦給嘉玲，嘉玲說：「佢（莊文強）都覺得齣戲好適合我做，只不過佢唔好意思開口係冇錢，係首部劇情電影得獎，呢個導演（譚惠貞）都係首次拍戲，政府資助300萬，300萬真係唔夠拍戲，大家唔計酬勞去做好件事，我請咗輝哥、張叔平剪片，區丁平做美術，大家都冇收錢，想好好將香港電影拍好啲。」能再與區丁平合作，嘉玲謂：「我鍾意個角色同人物性格，再去拉攏呢班人，呢班人對我嚟講好有安全感，佢哋好專業，亦睇住我大，我第一部戲就係拍區丁平嘅《說謊的女人》，佢哋好清楚我係乜嘢狀態。」
《以青春的名義》描寫師生戀題材，嘉玲對此看得很正面：「師生戀題材，我好鍾意，師生戀係百分之九十嘅人曾經遇上，只不過社會道德觀念排除唔應該發生，百分之九十嘅人有情竇初開嘅時候，對異性老師產生一啲幻想。走出父母關愛，第一次接觸就係老師，對老師仰望、欣賞、崇拜，老師畀咗好多唔同嘅關心、呵護，所以會好迷茫嗰樣係乜嘢。老師愛上學生嘅比率唔係咁大，通常係學生愛上老師，其實唔係真正嘅愛，係對異性真正嘅接觸。」
吳肇軒說：「讀書會見到一啲靚嘅老師，男仔會好瘋狂，我有時明白道德規範，啲老師唔可以亂媾啲學生。」嘉玲說：「唔可以咁睇，法國總統讀書時已經愛上老師，未必唔係好偉大、好合理嘅愛情，真愛可以經過時間考驗。我有鍾意過我嘅體育老師、英文老師同化學老師，佢哋好博學多才，佢哋講嘢好有自信，我鍾意訓練班一個老師，喺意大利返嚟，每日西裝筆挺，每日襯嘅呔都唔同，會有一種仰望，係香港、內地少呢啲題材，韓國、日本都會有。」
盡情揮霍
對於如何看待婚外情，以及婚姻曾否翻起波浪？嘉玲說：「婚外情唔係真係咁可怕，對於我嚟講，戲中角色若美嘅世界成個天冧咗落嚟，佢唔敢去面對呢件事，自己唔開心，越來越冇自信，尤其係見到老公外面個女仔又後生、身材又好過自己，更加打擊佢信心，如果我嚟講我選擇直接面對呢件事，去處理解決個問題。」
電影叫《以青春的名義》，究竟青春以何定義？嘉玲說：「青春好美麗，可以盡情咁揮霍，揮霍體力、青春乜嘢都得，一定要趁青春去做多啲自己諗唔到嘅嘗試，千祈唔好令自己嘅青春有遺憾。」吳肇軒謂：「一日仲有力，錯係冇所謂，一路都係青春，可以青春到人到終結時，一路青春落去。」
劉嘉玲
化妝：+0
髮型：Ken Hui
吳肇軒
化妝：BonBon of MOD Makeup Academy
髮型：Ziv of O4 Orient4
【劇情簡介】年少不守禮
以師生戀為題材的《以青春的名義》，講述吳肇軒飾演的學生張子行，從小在單親家庭長大，缺乏母愛，卻對母愛及愛情有着模糊不清的感覺。
子行在校外遇上由劉嘉玲飾演的代課老師葉若美，葉老師對子行出於關心，令子行漸漸對年長二十多歲的葉老師動傾慕之情。同時，葉老師因為丈夫出軌而情緒低落，她與子行越走越近，二人關係越來越曖昧，子行更在葉老師的丈夫面前親吻老師及示愛，雖然年少不守禮，卻給予葉老師有勇氣，令她面對自己的失敗婚姻。