周志文黐女無數被炒魷周志康默默做搵到食

【蘋果日報】正所謂同人唔同命，就算係孖生兄弟，命運都可能一人行一邊。好似周志康同佢個孖生大佬周志文咁，如果唔知佢哋係兩兄弟，真係唔會可以用「南轅北轍」嚟形容佢哋。
喺感情上，「細孖」周志康喺14年奉子成婚，一直同老婆Emily（盧芷茵）表現恩愛，仲有埋個可愛囡囡Emma，可謂一家三口非常幸福。反觀「大孖」周志文，有「花王」之稱，先後同過袁紫僑（CoCo，又名袁聖殷）及馬賽傳緋聞，12年仲搞到CoCo公開鬧馬賽，其後周志文又因拍《衝線》傳與同劇嘅蔡思貝打得火熱，後來仲有傳佢向吳若希、何雁詩、劉佩玥、陳瀅等姐仔埋手，最後冇得開花結果不特止，仲搞到食豉椒炒魷。
事業上，周志康同周志文同樣喺09年參加大台嘅《超級巨聲》出身，雖然兩人分別喺10同24強止步，但仍然被簽約成為大台藝人，演吓配角咁，喺「大孖」周志文被炒後，幸好細佬周志康未係好受影響，長期做音樂節目主持，雖然捧場客係少啲，至少有啲曝光率，形象都正面啲。