介紹6呎3細佬范丞丞范冰冰：多多關照

【蘋果日報】大陸一線女星范冰冰昨日喺微博介紹17歲親弟范丞丞，貼咗一張「韓男look」嘅相，留言：「正式給大家介紹一下，這是我弟，范丞丞，以後請大家多多關照。」男友李晨亦差唔多時間於微博出post，寫道：「給大家介紹一下，請大家多多關照。」果然係一家親，為范丞丞出道造勢。
有網民將冰冰同丞丞嘅近照，拍埋一齊比較，發現二人嘴巴一模一樣，讚佢哋個樣生得幾似。話晒范丞丞一早就想喺娛圈發展，之前去咗南韓接受練習生訓練。
日前有網民影到范丞丞喺大陸樹場現身，似係結束南韓練習生生活返大陸，同行仲有《Produce101》Season2當中嘅練習生朱正廷，據知丞丞月初返大陸係為咗參加節目《偶像練習生》，節目喺出年1月19號播出。丞丞所屬經理人公司「Yuehua Entertainment」雖然母公司喺北京，不過於首爾都有分公司，曾培養出「宇宙少女（WJSN）」程瀟。
丞丞於2016年曾被誤傳係范冰冰私生子，激到范爺採取法律行動嚟保護家人。范丞丞現年17歲，身高6呎3。