【今日ENT】直播平安夜騎呢事薛凱琪收三鞭酒

【蘋果日報】薛凱琪（Fiona）今年終於完成約定推出國語大碟《你我之間》，佢話其實早喺六年前已經對大家承諾會再出國語碟，但結果要咁耐先出到。近來忙宣傳新碟嘅Fiona，喺前晚平安夜現身本報fb專頁《娛果》直播節目《今日ENT》，一齊開心度過平安夜。Fiona即場唱咗首《White Christmas》應節，祝大家聖誕快樂，問佢聖誕節會諗起啲咩？佢話：「聖誕節係最開心嘅日子，仲開心過生日，聖誕節好似係大家都一齊生日咁，互相送禮物，又有燈飾，好浪漫。」
環保交換物品
噚日聖誕節Fiona喺工作中度過，問到佢有乜願望？佢就話：「我覺得願望唔可以亂許，因為你會浪費咗個機會。」Fiona仲話聖誕節同一班朋友有個約定，就係要拎啲大家唔太需要而又用得嘅嘢交換禮物，結果就梗係拎到好多奇奇怪怪嘅禮物啦，佢話：「試過收到三鞭酒同鎚仔呢啲完全冇用嘅嘢。」
Fiona仲講到最難忘嘅聖誕節就係同媽咪去芬蘭睇北極光，點知睇唔成，全程得個凍字，啱啱到埗時仲唔見咗行李箱，搞到全程都要着媽咪嘅內衣褲。佢仲因為唔想啲鹿辛苦而唔坐鹿車，自己喺雪地徒步行去郊外睇極光。