【馮仁昭四圍超】星二代有壓力許懷欣音樂難維生

【蘋果日報】許冠傑41歲大仔許懷欣（Ryan）遺傳爸爸嘅音樂天份同熱誠，近年以樂隊The Stay Up發展，下個月喺網上出新歌《Crooked Smiles》。Ryan日前踩入銅鑼灣，同鼓手Tim喺街頭busking，戴住聖誕老人面具做「蒙面歌手」唱歌，之後除面具唱《半斤八兩》，吸引唔少人圍觀。Ryan本身做緊graphic design，幫品牌同唱片封面設計，佢話喺香港做音樂係辛苦，要有份正職去維持生計。
畀囝囝自由發展
作為星二代難免有壓力，Ryan話：「爸爸出道時冇互聯網、文化唔同，冇得比較。」講到一對6歲大嘅孖仔許俊同許朗，佢話會畀囝囝揀想行嘅路：「一個鍾意做科學家，一個想做老師，我細嗰時爹哋冇逼我玩音樂。」音樂拉近父子距離，Ryan話：「可以同爹哋、兩個仔share音樂，我覺得好開心。音樂係我哋嘅細胞，希望可以繼續做。」問到想唔想踩入紅館開騷？佢話：「如果有一日Ryan嘉賓係Sam Hui，that's will be cool，不過都係《最緊要好玩》。」
撰文：馮仁昭