【馮仁昭四圍超】削面三部曲胡鴻鈞V變尖煞

【蘋果日報】胡鴻鈞早年屢變面頻頻，由初出道嘅起角面形，到依家面形尖尖，當時網民更貼文大指嘖嘖稱奇，更開玩笑指佢「削骨還父」。噚日，佢現身銅鑼灣hmv為新碟銷售成績理想搞祝捷，見佢面形離奇又變尖，相當V煞，尖面情況趨向內地網紅蛇精男。胡鴻鈞除咗面形「進化」，今年歌唱成績都好有進步，因為佢以《朋友身份》一曲入圍叱咤「我最喜愛的歌曲」最後五強，同李克勤《失魂記》、方皓玟《假使世界原來不像你預期》、陳柏宇《霸氣情歌》、ToNick《長相廝守》爭獎。
入圍仍激動
提到呢個入圍好消息，胡鴻鈞就表現好開心，話平復完又再激動，同要多謝大家支持，仲話對佢嚟講係超額完成，因為其他對手都好強勁。問到會有乜嘢慶祝，胡鴻鈞就話：「出年會繼續努力做音樂，今年大家畀我好多愛、期望、信任。」提到其所屬公司星夢娛樂因為不滿新城音樂頒獎禮，所以決定拉隊缺席，變成冇獎攞，胡鴻鈞話：「會跟番公司決定，制度上轉變，公司同電台傾緊，我會配合公司，之後會支持番，我唔係做一年音樂，會長做嘅，今年最大收穫係咁多人支持，比獎項更重要。」
撰文：馮仁昭