【馮仁昭四圍超】前政協之後　吳千語新歡起底

【蘋果日報】吳千語被指認識新歡有米男士，導致林峯提出分手，五年情玩完。二人出席活動時都暗示有兩個月冇見面。噚日有周刊爆千語戀上嘅對象就係前全國政協施子清長孫施伯雄，報道又指分手並唔係林峯提出，而係吳千語早喺半年前講想分開，當時仍然愛得癡情嘅林峯即時放下手上工作，陪吳千語去歐遊兼濕平，暫時挽救到這段戀情。可惜事隔不到半年，喺馬天佑介紹下，吳千語順利箍實28歲「富三代」施伯雄，正式同林峯斬纜。新歡家族財力比林峯更上一層樓，加上有傳林峯家人唔鍾意千語，所以千語一直未有物業揸手，只係收到林峯送嘅一堆名牌。
據報道稱千語呢幾個月上咗橫店開工，「富三代」施伯雄又去上海做生意，千語同施伯雄就成日喺上海見面，為咗唔影響自己喺施家嘅印象，千語又未搬出同林峯嘅愛巢，所以見新歡時，千語刻意搵埋馬天佑同場做電燈膽。
貼地搭港鐵
林峯同千語BB拍拖，都必到名店買嘢，又月租豪宅安置千語家人，反而「富三代」施伯雄家族低調，自己創業，平時坐港鐵代步。睇嚟千語都要跟新男友睇齊貼地，吳千語噚日透過公司回覆本報時表示：「沒有事實根據的，抱歉不回應，謝謝！」
撰文：馮仁昭