上原多香子爆醜聞　停工撤出豪宅遭解約

【蘋果日報】日本組合SPEED嘅34歲成員上原多香子喪夫三年，去年8月初突然爆出其離世丈夫TENN當年自縊身亡係因為發現愛妻不忠，更驚爆姦夫就係「日本F4」阿部力，消息導致上原多香子形象盡毀。不過，自醜聞曝光後，事務所已停止出糧多香子，仲有開除佢嘅打算，或解約後改作部頭合約，有指多香子將要搬離住開嘅高級住宅，告別富貴生活。
多香子嘅蕩婦形象遭一沉百踩，令佢被迫叫停所有工作，當完成早前舞台劇後已未有公開露面，目前佢與舞台劇作家高山和也熱戀，雖然多香子嘅演藝事業宣佈玩完，但原來佢喺休業前獲事務所每月出糧，報道指公司念在SPEED當年帶來嘅貢獻，之前一直向多香子提供200萬日圓月薪（約13萬港元），認真唔話得。