爆少時宿舍鬧鬼 Sunny：張床係咁搖

【蘋果日報】韓國嘅經紀公司為咗方便管理藝人，都會安排旗下藝人住宿舍，特別係組合成員更加要住埋一齊。而出道10年嘅韓國女團少女時代(少時)亦曾經歷宿舍生活，雖然各成員已經陸續搬離宿舍，但宿舍生活依然係難忘嘅回憶。
日前少時成員Sunny就喺綜藝節目大爆以前嘅宿舍生活，更稱曾經喺宿舍撞鬼，嚇親現場其他人。Sunny表示少時同居住喺第一間宿舍時，佢同Yuri同一間房，續指：「記得有一次Yuri喺房玩電腦，其他成員經過時房門時，見到一個長頭髮嘅女仔挨住Yuri睇電腦螢幕，但因為該女子頭髮放得好低，成員以為係我同Yuri一起。不過後來成員先發現當時我仲沖緊涼，其實間房只得Yuri一個。」
Sunny又指呢件事係好耐之後成員講返畀佢聽先知，不過就曾經有過親身經歷：「有一晚我瞓到半夜時覺得好頭暈，以為係太攰所致，但低頭一望，見到有個陌生嘅長髮女子望住我，仲不停搖我張床。我嚇到唔敢出聲，只好喺心裏面講『唔係真嘅！唔係真嘅！』咁安慰自己。」Sunny又指Yuri似乎唔知間房鬧鬼，而佢亦唔想嚇親Yuri，就搵咗個理由搬咗出客廳，直至少時換新宿舍。