【好友致哀】吳麗珠每晚祈福

【蘋果日報】洪羅拔生前人緣很好，跟不少圈中人稔熟，對於他的離開，大家都感到非常傷心。
吳麗珠：
好唔開心，佢患病後，我每晚都會替佢祈福，舊年底見面，佢當時都好精神。洪羅拔為人率直，心地好，佢係大家開心果，講笑話好叻。
郭政鴻：
當年佢係第一個鼓勵同支持我入娛樂圈嘅人，我仲記得佢借衫畀我着，等我可以好好見人，佢係第一個鼓勵我參加第四屆新秀歌唱比賽。同佢嘅一點一滴我永遠都唔會忘記！希望你去到另外一個世界，可以繼續開開心心，一路好走，永遠懷念你。
胡越山：
人始終都係要走，佢之前有癌病，可能係擴散咗出去！我對上見佢一次係大半年前，我囝囝胡㻗一出世就同洪羅拔上契。
契仔羅天宇：
收到呢個消息，我哋都覺得好愕然同難過，希望佢可以安息，唔使再受苦。佢由細到大都好錫同照顧我哋，好似屋企人。
契細佬漢洋：
最後一次見係兩個月前，當時佢有講有笑，行得走得，身體復原當中，當然同全盛時期唔同，要休養。佢最鍾意講笑，一齊影大合照，佢對朋友好好，出道睇我哋大。
司馬燕老公吳忠義：
這是很傷感，他真是一位很好的朋友。
寇鴻萍：
佢今個月9號生日，本來朋友約咗5號食飯，我仲準備咗生日禮物畀佢，點知佢嗰日病咗出唔到嚟，份禮物我仲留喺度，佢離開好突然。人真係好化學，要珍惜眼前人。
向展邦：
兩年前知佢發現肝有腫瘤，佢哥哥喺16年年頭因肝病過身，佢係一個用心對朋友嘅人，希望佢一路好走。