【馮仁昭四圍超】死敵Stephy封后　傅穎拒破冰

【蘋果日報】傅穎（Theresa）死敵鄧麗欣（Stephy）前日得到香港電影評論學會最佳女演員獎，噚日輪到Theresa現身，佢同樂隊Supper Moment（SM）喺屯門拍攝服裝廣告，Theresa大方恭喜Stephy：「好開心，對演員嚟講都希望得到人嘅認同，恭喜佢。」但就唔會打電話畀Stephy講恭喜，因為已經好耐冇聯絡。點解唔趁呢個機會打破沉默？佢笑笑口話：「大家各自安好。如果有緣份，遲早都會見面。」至於昔日好姊妹吳雨霏（Kary）同楊愛瑾（Miki）都結晒婚，問到Theresa有冇酸溜溜，佢即話：「點會，開心都嚟唔切，我冇所謂，感情要嚟都擋唔住。
SM開始做運動
原來Theresa上年已經同內地男友分手：「我依家單身，上年和平分手，因為大家冇乜機會見面，不過我哋仲有聯絡。」新一年想唔想拍拖？佢話暫時唔想拍拖住：「大家見面少，性格又係問題，和平分手。」另外，SM話佢哋開始年紀大，要注重運動：「我哋有隊東啟德樹懶籃球隊，參加聯賽就贏咗，因為我哋四個有嘢做冇去參加。」
撰文：馮仁昭