繼唧朱古力後又一力作霆鋒用熨斗整punk頭

【蘋果日報】Chef LeMon自從回歸樂壇後，當然要顧及個人形象，昨日貼咗一條教大家用「男士set頭神器」嘅片，工具奧妙之處係好似摺凳咁藏於民居之中，又可以熨衫嚟隱藏功能，呢個神器就係……熨斗!
唔係講笑，真係一熨變男神……霆鋒喺facebook片中示範，個頭枕喺熨衫板上，用熨斗半熨頭髮兩側，set咗一個punk頭。
敢問喺呢個年代，除咗霆鋒型到盡頭，仲有邊個可以駕馭呢個Punk得咁自然嘅髮型，有網民問霆鋒有冇「確定插咗電源嗎」、「看來能駕馭熨斗的人也只有你了」，亦有網民笑呢個Chef LeMon Style係唔係會融入煮食當中，「下次攞風筒炒乾炒牛河」、「下次搵個熨斗熨熟啲肉做LeMon料理」。
另外，唔少網民記得喺電影《富貴再逼人》中，有一幕講演董驃大女「帶弟」嘅陳奕詩就係用熨斗幫外籍同學整造型。