蘇韻姿靠「紅衫魚」入屋港姐殿軍又如何

【蘋果日報】大台處境劇《愛．回家之開心速遞》，其實某程度上比好多劇集嚟得更強，因為套劇夠入屋，就算劇情、演技幾膠都好，一班觀眾都睇得好開心，最後益嘅就係一班本來冇人識嘅藝人喇。
好似劇中嘅「紅衫魚」蘇韻姿同「池子孝」阮政峰咁，佢哋兩個早前貼咗「愛的手勢舞」﹐阮政峰仲偷吻咗蘇韻姿一啖，呢件事令到好多人都留意佢哋，不過喺《愛．回家之開心速遞》播出前，大家都唔知蘇韻姿係邊個...
蘇韻姿2016年參加港姐，攞咗個第四，輸咗畀馮盈盈、劉穎鏇同陳雅思，之後就喺大台做下啲綜藝節目，最勁都係喺《愛．回家之開心速遞》做熊心如。
原來「紅衫魚」蘇韻姿嘅家庭好複雜，早前有報道話，蘇韻姿嘅爸爸原來喺加拿大賭場做經理，本身同蘇母育有一對子女，即蘇韻姿同胞弟，但報道入面就有知情人士報料話，蘇父背住蘇母搞婚外情，同第三者生咗個仔Antho，最後蘇父同第三者分手，報道嘅知情者就話，蘇母覺得小朋友係無辜，所以就接咗Antho返屋企住，同蘇韻姿兩姊弟一齊生活，報道就話佢哋三個嘅感情都好好，而蘇韻姿亦不時喺IG貼出同兩個弟弟嘅相。