張耀堂接掌八達通大熱

【明報專訊】八達通爆出私賣個人資料事件後，被指「講大話」嘅行政總裁「P姐」陳碧鏵早喺8月已經主動請辭，邊個接佢呢個位一直未有公布，近日行內開始傳出風聲，話其中一個呼聲超高嘅候任人選，就係啱啱辭咗Visa港澳區總經理一職，家放緊假歎世界嘅Sunny張耀堂。

小琴聽到呢個消息後不禁講咗一句﹕「喺咪咁橋呀？」點解咁講？皆因P姐未做八達通CEO之前，其實就係做Visa港澳區總經理，家Sunny又傳出由Visa呢個位，跳槽去做八達通CEO，唔知係P姐同Sunny有淵源，定係八達通董事局特別鍾情做過Visa港澳區總經理嘅人，搞到呢兩個其實隸屬於兩間唔同公司嘅要職，好似有「升職」關係咁。

Visa透露下月正式離任

匯豐前主席施德論如無意外，會如期喺明年1月1日開始代替梁國權出任八達通主席，至於Sunny喺咪會「順利過渡」，同埋幾時會返新工，小琴都等緊八達通正式宣布。但Visa發言人早前就同記者行家講，Sunny會明年1月7日先至正式離任，佢嘅職務，暫時會由喺Visa做咗10幾年嘅辛瑋達接手喎。

喺銀行界做咗好多年嘅Sunny，之前喺花旗、道亨同埋星展做過，2009年初先再跳槽去Visa，小琴希望佢善用多年嚟搞信用卡，處理個人資料嘅經驗，搞番掂八達通「個朶」，唔好再行P姐條舊路喇！

報料電郵﹕piano@mingpao.com