蒙牛創始人 捐出全數股權

【明報專訊】蒙牛（2319）創始人牛根生，自從2008年「三聚氰胺」毒奶事件後，開始變得低調，舊年中糧集團入股蒙牛成為大股東之後，佢亦開始淡出蒙牛權力核心，噚日佢仲宣布，已經將佢名下全數蒙牛股權資產，捐畀「Hengxin 信託」，全力推動公益慈善事業。

個人名下股份市值14億

根據蒙牛年報，牛根生個人名下最少持有6878萬股蒙牛股份，市值14億元。牛根生通過公司名義另持有逾億股，又因為與多名管理層有一致行動協議，被視為合共持有2億多股權益，後兩者究竟多少由牛根生實益持有，是否包括在今次捐出的股權當中，小琴唔敢講，但單計私人筆，都值10多億元，真係十分慷慨。

至於「Hengxin 信託」到底做過乜？蒙牛發言人就話，呢個基金曾經同過中國紅十字會、中國扶貧基金會、壹基金、大自然保護協會，以及內蒙古慈善總會等等慈善組織合作過，由牛根生成立嘅「老牛基金會」當然亦係受益機構之一。

雖然牛根生話，今次捐出股權係履行佢多年來回饋社會嘅心願，但係其實佢淡出蒙牛管理層嘅計劃早已有迹可尋，中糧集團及厚樸基金嚿年8月以61.2億元收購蒙牛兩成股權後，佢已經無做公司行政總裁，今年4月，蒙牛又再宣布牛根生希望「專注蒙牛及其附屬公司的戰略管理及規劃」，故由執行董事調任為非執行董事。