歐鎧淳不敵華姐 搣豬腩肉問：點解練極冇腹肌

【蘋果日報】女人要靚，真係唔可以懶！好似今屆港姐冠軍雷莊兒（Juliette），佢即將代表香港參加《2018國際中華小姐競選》，雖然好多人都覺得佢唔夠靚女，但佢確實好勤力，而且充滿自信。
前日Juliette喺ig story上載咗做運動相片，佢同幾位佳麗一齊做運動操fit，見Juliette練出六嚿腹肌，狀態大勇，連擺姿勢影相都自信過人，難怪早前一班華姐初見傳媒，Juliette已被認定有機會問鼎三甲。
相反，有「泳壇美人魚」稱號嘅歐鎧淳，近年半隻腳踏入娛樂圈，又出活動，仲同圈中人胡子彤拍拖。唔知係咪疏於練習，歐鎧淳今日都係ig story上載一段做運動嘅片，但個樣就好愁，因為肚皮啲肉鬆晒，連佢自己都忍唔住搣起兩大嚿肉，真係陰公豬。佢慨嘆話﹕「日日練習，點解都冇腹肌。」