中證監換人坐鎮港證監

【明報專訊】中港講求金融融合，所以近幾年本港嘅金融監管機構，都愛聘請或借調內地專才來港。香港證監會早响07年，已向中證監借調基金監管部主任孫杰來港，做香港證監會嘅中國事務資深副總裁。不過，聞說孫副總裁近月已離開香港證監會，但中證監覺得有個「自己人」坐鎮香港證監會好緊要，所以已經覓定新人選，擇好良辰吉日後就來港履新。

覺得無乜發揮 孫杰乘機退休

香港證監會份糧，照計好過內地，何以孫杰唔肯留低呢？金融界中人話，孫杰响香港證監會做咗三年幾，但覺無乜發揮機會，橫掂夠鐘退休，不如早點歸去。無理由㗎，家陣咁多金融事務涉及中港，一個熟知內地境况嘅「中國通」，照計好應該大派用場喎，點會無用武之地呢？不過，傳聞話香港證監會嘅高層，就算係處理內地事務上，都選擇自己攬晒上身，唔係好想放權畀人，亦唔多鍾意諮詢孫杰意見，所以令到後者相當無癮。傳聞嘅嘢孰真孰假好難證實，實情係點？可能要問問喺香港證監會專責中國事務嘅副行政總裁張灼華。

講開張灼華，自從證監會行政總裁韋奕禮話提早劈炮後，外面即傳佢係接棒大熱，但證券界中人似乎唔多認同，有啲人仲話，如果搵港交所前行政總裁周文耀做證監會總裁可能仲啱數。