【愛情DQ掣(16)】咪亂摸！貼身跳華爾滋　法拉bb：浩嵐面紅

【蘋果日報】今集《愛情DQ掣》嚟到法拉bb Sumi同Youtuber浩嵐嘅Second Date。話明第二次約會，梗係要有更多交流啦，一齊學跳舞就啱晒。聽到今次要學華爾滋，曾經學過K-pop嘅Sumi似乎冇好大信心：「希望我唔會拖累佢啦，我驚踩到佢呀。」浩嵐就話：「我本身成個地盤佬咁，地盤佬學跳舞已經夠黐線！」


先嚟分開學基本步。一開始，Sumi跳得似模似樣，相反浩嵐有啲跟唔上，搞到Irene老師一路數拍子，一路話：「等埋你呀浩嵐！」跳唔夠15分鐘，浩嵐就開始按手臂，睇你都係平時少做運動啦。


分開學完之後，終於要埋身一齊夾舞步。老師叮囑浩嵐：「hold實佢，收埋啲手指，唔准周圍郁喎！」見到Sumi同浩嵐好似企得好開，老師笑話：「好拘緊呀你哋，行埋少少先。」事後問到Sumi驚唔驚同異性有咁親密嘅接觸？佢對浩嵐充滿信心，「唔係好驚佢會摸其他地方，浩嵐係個正人君子嚟㗎！」


為咗令佢哋多啲交流，節目組預備咗問題卡，等兩位喺休息時間傾多啲計。Sumi話最鍾意去旅行嘅地方係菲律賓，「之前考咗個潛水牌，同埋我好鍾意陽光與海灘。」浩嵐隨即就問：「係咪好多撈麵食o架?」Sumi突然靜咗落嚟...兩秒後打破沉默:「嗰度係印尼喎！」令全場即刻爆笑！


想知道佢哋仲傾咗啲咩？Sumi同浩嵐學跳舞學成點？咁就要即刻去片！

場地提供：創藝舞蹈學院

主持、撰稿：何宛珊(表妹)

攝影：馮峰、馮燊明、梁依能

後期：梁依能

視覺設計：Cammie

編審：仙

編導：梁依能

監製：仙

最港電影大獎投票網址

http://bit.ly/thekongestfilmawards

精選娛聞，喺晒《娛果》

http://fb.com/appledailyent