星巴克IFC賣千層麵米飯卷

【明報專訊】通脹殺到，乜都話加，唯獨未知人工有冇得加。香港星巴克咖啡營運主管伍鳳英話，佢哋暫時未有加價計劃。另外，喺中環國際金融中心嘅分店，就會增加熱湯、千層麵、米飯卷等熱食，希望畀顧客多啲選擇。

星巴克預計，出年嘅租金同成本，比今年大約升20％。做老闆嘅，自然可以大條道理加價啦。但伍鳳英就話，暫時未有加價計劃。星巴克嘅分店，喺大型商場、旅遊區等，業主加起租嚟，30幾蚊嘅咖啡，要賣幾多杯至應付到交租呢？而且入親去飲咖啡嘅，都至少坐番半粒鐘至走。點樣可以開源節流增加收入，又唔使加價呢？

未有計劃加價

伍鳳英話，選舖會喺更好嘅位置，家本港有108間舖，佢哋覺得市場未飽和，未來會繼續開舖，例如﹕尖沙嘴、旺角。人手方面，都會適當咁分配，例如﹕繁忙時間安排多啲兼職員工，唔會令同事超時同超工作量。家佢哋有1300個員工，長工同兼職比例大約7比3。

另外，星巴克國金（IFC）分店喺午餐同晚餐時間，加入熱食，除咗熱湯、肉醬闊麵，仲有啲中西混合嘅海南雞黃薑飯卷、燴牛尾野米卷，由32元至56元，一份午餐大約要60元至88元。

食物由外判公司提供，喺店內翻熱，伍鳳英話會考慮喺其他分店加入熱食，家先熟習吓。除咗食物加多種類，佢哋又喺唔同舖嘅設計花心思，間間有啲特色，例如﹕尖沙嘴文化中心分店，有一個位置掛有本港藝術家作品；星光行地庫分店其中一幅牆壁，由城市大學美術系師生設計，伍鳳英話，希望同一杯咖啡，帶畀客人唔同感受。