龍哥幫希哥行騷背心仔相邊張先係原圖

【蘋果日報】大家一定聽過「你的樣子如何」呢句嘢，通常配呢句說話嘅圖，都係一張陳冠希同一個阿叔嘅相，相就係阿叔着住背心短褲「白飯魚」，而陳冠希就喺前面好型咁行，但又會有一張係調返轉，阿叔喺前面好型咁行，而陳冠希着住背心短褲「白飯魚」。其實呢個係一個世紀難題，因為冇人知道邊張先係原相，到底着背心短褲「白飯魚」嘅係阿叔定陳冠希呢？


喺解決呢個難題之前，先介紹一下呢個阿叔，佢絕對唔係普通人，佢係由陳冠希細細個開始照顧佢，到今時今日都喺陳冠希身邊，陳冠希仲當佢好似爸爸咁，佢就係龍哥喇。


喺日前陳冠希就出席紐約時裝週，仲以中國嘅名義「Made in China」參與，當然就有佢設計嘅衫，當中仲有一件tee係喺心口大大隻字寫住「華人」，但呢個唔係重點，最重點係龍哥竟然做陳冠希模特兒，出嚟行騷，仲好有型。而陳冠希仲貼埋上自己facebook，畀人睇下龍哥有幾型。


講完龍哥有幾型同幾重要，係時候解開世紀難題喇，到底張相邊張先係原相，睇番資料，張相係出自2011年6月嘅《忽然一週》，當時係記者影到陳冠希同龍哥一齊現身，而着住背心短褲「白飯魚」嘅，就係陳冠希喇，所以話靚仔真係着咩都咁好睇，而龍哥都不失霸氣。