【蘋果日報】【閃耀人生女人心 袁詠儀系列之2 試盡方法】袁詠儀（靚靚）最近接受本報連載式專訪，今回講到追女經，她與張智霖（Chilam）結婚17年，只得張慕童（Morton）一個兒子，其實早幾年前，他們曾希望追多個女，不過一直沒成功。問到46歲的靚靚會唔會考慮人工受孕等方法？靚靚帶笑說：「其實你所講嘅我都試過晒，首先我中醫調理身體，又針灸，又瑜伽，到咗某個時候，我覺得可能要依賴一啲醫學上面嘅嘢，咁我就去‥‥‥當然就係可唔可以人工受孕啦。」想生多一個小朋友原因，靚靚完全是為魔童：「我生完個仔之後，個仔到咗六、七歲，我就全力咁去試、去做，因為我發現個仔得一個嘅時候佢又悶，同埋佢好自己，好多嘢嘅角度都好自己，但係我想話畀佢聽個世界唔係得你自己，仲有好多人、好多嘢，我好想佢懂得同人分享，所以我就好想去生多個。」
雖然魔童今年只得11歲，但靚靚指兒子有時討論好深的問題都表現得很成熟，她說：「我話畀佢聽我想試吓有冇多個BB，佢初初唔贊成，但後來唔知點解佢就好贊成。例如我要食一啲藥，或者我要做啲乜嘢，我都會同佢講，因為我想要多個BB，所以就要咁樣做囉！咁佢就會『哦！』咁樣。」
魔童爆喊
靚靚試了幾次人工受孕後，有一次以為好有機會成功懷孕，還向魔童報喜訊，可惜最後都失敗，她表示：「我發現個原因，原來我嘅年紀就係我最大嘅敵人，啲人問點解唔搵代母呀？唔關事㗎！我嘅身體好健康，但我嘅卵子已經老喇！我覺得我需要話畀我個仔聽，因為佢成個過程同我一齊去見證，我同佢講sorry呀！我真係對唔住，冇辦法啦！我個仔即時爆喊，喊到呢，傷心到呢！好似搶走咗佢所有玩具咁，因為佢好想要個細佬或者細妹，所以佢諗諗吓又喊，諗諗吓又喊，我真係冇諗過佢會咁！」
採訪：陳月媚
化妝：Kerry wong
髮型：Sam Pan of Muse Hair
場地提供：好酒好蔡
新聞類別
娛樂
詳情#
回應 (0)
