分手就可以食金菇鄭元暢：謝謝妳這四年的陪伴

【蘋果日報】鄭元暢出道以嚟，甚少緋聞，最為人知就係佢拍偶像劇《惡作劇之吻》演江直樹，被傳同「湘琴」林依晨戲假情真，不過林依晨於2014年同拍拖3年嘅圈外男友林于超結婚，鄭元暢同林依晨嘅緋聞告終。
點知鄭元暢噚晚於facebook自爆分訊，喺情人節深夜先講「分手」咁絕情…
情人節當日朝早，鄭元暢於fb貼出一張拎住玫瑰花嘅相，留言：「有『情』的人過的節，祝我們都快樂。」怎料深夜即po「214的分手宣言」，題為《寫在分手時~致那些年我們一起的親密時光》，劈頭第一句就係話「我們回不去了」，佢話同對方相處四年，從一開始唔熟識、磨合到緊緊相依，呢個過程有悲有喜。
「記得剛在一起的時候，常常因為妳，我吃不好、睡不著，但我知道這是必經的過程，我努力改變自己，改變我說話的方式,、我的飲食習慣,在我忙碌的工作行程中盡力排出時間來維繫我們的關係，這一切我痛苦並快樂著。」
「多少個夜晚我一直想像這一天的到來，終究，還是要別離。」
「謝謝妳這四年的陪伴，也因為妳，我成為我更喜歡的我自己，我想我們彼此的付出也就值得了。」
分開並不是結束，而是新的開始，我們都自由了。我會努力習慣沒有妳的日子，分手不說再見」
睇到唔少fans震驚得o晒嘴，鄭元暢一向係「緋聞絕緣體」，根本冇人察覺佢有一個相處四年嘅「伴侶」。
不過fb長文未完，再拉落啲睇就會有答案，鄭元暢口中嘅「妳」就係陪伴四年嘅牙套，他開心咁留言「掰掰牙套，喔耶」仲開心咁話終於可以食金菇，唔少fans睇到呢篇文心情恍惚好似坐過山車咁，由驚訝去到爆笑，忍唔住話鄭元暢超壞。