羅仲謙《女兒國》包場冧楊怡志玲6億特技變身

【蘋果日報】賀歲片《西遊記女兒國》出動奧斯卡金像特技班底，投資超過6億港元打造四大特技場面，包括一開場師徒四人，在河上被河神追逐的驚險場面，飾演河神的林志玲，在戲中雌雄莫辨，都是全靠8粒鐘的倒模技術，加上電腦特效作後期加工，令志玲可以一時變魚、一時變巨人後再幻化人樣。
另外有一場孫悟空四師徒聯同女兒國四侍女，大戰女兒國聖地兩隻巨型蠍子，拍攝時所有演員都要吊威吔左衝右撞，蠍子係後期電腦加工；另一亮點係唐僧同女兒國國王，搭船去到封印盡頭時，喺超級巨門前，由特技打造門內門外不同世界場景。
此外，羅仲謙前日情人節帶同老婆楊怡喺圓方戲院包場，招呼屋企人同fans睇《女兒國》。楊怡話兩公婆好少賀情人節，所以都冇收到禮物，不過謙仔話：「都未入場，入場咪知囉。」今年佢哋會繼續努力造人，希望有好消息公佈
送花製造驚喜
入場後原來謙仔早有「預謀」買定花，喺200多名親友同fans見證下送花。毫無準備嘅楊怡收花後甜到漏，謙仔即時為自己平反：「頭先做訪問仲投訴我。」而《女兒國》喺內地零點場票房約收1.8億人民幣。