鄭嘉穎收陳凱琳姊妹利是 賴慰玲﹕Wakakaka

【蘋果日報】亞視嘅《我和殭屍有個約會》有新年聚會，無綫嘅《殭》原來都有。前晚賴慰玲同老公梁子峰就帶埋兩個月大囝囝Marat去咗嘉穎屋企拜年，同場仲有陳嘉寶(Anjay)同老公黃頌祈，當然唔少得陳凱琳(Grace)以半個女主人身份招呼好友啦，一雙一對真係好熱鬧。
賴慰玲同陳嘉寶都係去年結婚，今年第一次派利是，心情特別興奮。嘉穎雖然係前輩，但佢同陳凱琳仲未結婚，所以有得收利是，賴慰玲喺ig留言﹕「帶Marat去逗利是，要派利是俾鄭生、陳小姐，Wakakaka。」賴慰玲昨日接受傳媒訪問時話﹕「嘉穎每年都有派大利是俾我同Anjay，所以今年可以派番俾佢感覺好得意。」而Anjay就話大家食吓嘢，睇電視好開心，問有冇向嘉穎催婚？佢話﹕「佢哋不嬲都好sweet，好開心。相信佢哋自己有分數啦，做朋友最緊要見到佢哋開心啫。」
而陳凱琳就話契仔Marat溶化咗佢個心，可以日日夜夜對住佢，仲笑言﹕「多謝兩位甜美人妻嘅利是，Lucky me！」Anjay就大讚契仔好得意，收利是嘅人開心，自己亦派得好開心。