林利低調處理11cm腫瘤好友胡渭康：cancer未必冇得救

【蘋果日報】51歲嘅林利接受腸道檢查，始知身體內多咗一個11cm腫瘤，但林利睇法豁達，低調處理，做完手術亦只得兄弟胡渭康知道，前晚胡渭康出席《我的情敵女婿》慶功宴，講到林利患腸癌，佢話：「林利當日拎咗醫療報告之後，有同我講，我自己唔係好驚，我都係一個happy man，傷風感冒都可以死得人，cancer未必冇得救。當時第一時間去了解林利嘅心情，確定有人照顧到佢，同埋搵唔搵到適當醫生。」
胡渭康覺得o依家醫學好好，但命水就好難講，林利好堅強：「我有好多次話陪佢去醫覆診，但佢話唔好，驚我出現又變得高調咗。佢出院之後我有探過佢，其實唔需要太擔心。」
林利係上個月24號做手術，而胡渭康就係今個月2號開演唱會，相隔日子好短，但林利都堅持要做佢演唱會嘉賓，胡渭康話：「我有叫佢唔好嚟，唔好勉強自己身體，但開騷時，佢真係有現身，我叫佢唔好上台唱歌，但佢一意孤行上台唱咗兩首歌。當時見佢成日掩住個肚，我仲講笑話佢因為割完包皮嚟做我演唱會嘉賓，我驚佢傷口會爆。佢對舞台好有熱誠，做人亦好有義氣，大家唔使擔心佢，佢復完得好好，嚟緊仲會拍新劇。」