猷啟做準新郎超雲超蓮專注事業

【蘋果日報】何超雲係賭王何鴻燊三房長女，剛度過29歲生日，有樣、有家底、有事業，可惜自從2013年同陳山聰分手後，一直未見再墮愛河，而佢親細妹超蓮，亦係未見有固定男伴，自從2015年同台灣男歌手吳克群分手後，忙於打理家族生意，又開餐廳同成立慈善組織，公事極忙。至於超蓮個龍鳳胎細佬猷啟，反而姻緣大旺，早前更宣佈成功向國產女友求婚成功，叫做爬晒兩個家姐頭，搶先成家立室。
至於同超雲等同世代嘅四房子女，同樣都係仔嘅桃花運較強，好似猷君戀上大陸超模奚夢瑤，仲一齊拍攝大陸真人騷《愛的時差》，而佢哥哥猷亨亦被指與陳瀅復合。而四房嘅長女超盈，過去6年皆保持單身，專心搞藝術拍賣及文化事業，大前年仲成為保利澳門拍賣公司嘅CEO，同媽咪梁安琪一樣做女強人。至於被賭王盛讚「靚到不得了」嘅四房孻女超欣，現於美國麻省理工學院（MIT）升讀大學，四太曾爆個女多人追。