【馮仁昭四圍超】雨僑收大禮　父母冧女婿

【蘋果日報】雨僑、羅力威將會喺今個月31號擺酒註冊結婚，前日佢哋按傳統習俗過大禮，由阿威家姐負責統籌，一身紅噹噹嘅準新娘雨僑喺Instagram開live分享過程，喺佢面前有一大堆海味，雨僑留言話：「只有一家三口的我們應該要吃到明年了。」而過大禮傳統係準新人避席，雨僑喺屋企等，阿威就陪家姐拎過大禮嘅禮物到女家樓下，雖然阿威唔可以上樓，不過就託親友拎杯咖啡上樓畀老婆飲，令雨僑冧到爆，雨僑話：「過大禮送埋咖啡，佢真係好細心。過大禮之後，我哋一家人去咗飲茶，將過大禮收嘅禮帶返去長洲，因為我喺長洲長大，仲有親戚係嗰邊。」
船上開新娘P
雨僑父母都對呢位準女婿畀足一百分，因為阿威有誠意同做到足，雨僑話：「我爸爸媽媽從簡都得，但男家好好，佢哋搵海味時，原來鮑魚、髮菜、冬菇等等都有好多唔同等級，好彩識朋友幫手，樣樣都買啲。其實最緊要心意，噚日樣樣都好滿意，我媽咪笑到見牙唔見眼。」另外，雨僑噚日再喺Ig貼咗張着到靚靚喺船上開派對嘅相，留言：「突然被帶上船然後運到海中心。原來是為我籌備了四個月的新娘派對！」
撰文：馮仁昭