【馮仁昭四圍超】張艾嘉奪AFA終身成就獎

【蘋果日報】亞洲電影大獎學院主辦嘅「第12屆亞洲電影大獎」（AFA），下星期六會喺澳門舉行。噚日大會宣佈頒發「終身成就獎」畀現年64歲嘅張艾嘉，到時佢會親身出席領獎。
演員出身嘅張艾嘉獲行內人尊稱「張姐」，出道作品係73年同許冠傑、王羽合作嘅《龍虎金剛》，不過要數到最為人熟悉，自然係同麥嘉合作嘅《最佳拍檔》系列中飾演嘅差婆。代表作仲有同周潤發合作嘅《阿郎的故事》，演而優則導嘅作品《最愛》，為佢第一次贏到香港電影金像獎最佳女主角，之後再憑《地久天長》喺金像獎封后。
《相愛相親》入圍
入行40幾年嘅張姐話仲有好多香港情同香港事嘅題材想寫：「有時我走到一啲香港嘅老地方，我都會覺得，嘩，好好玩！大家都忘記香港係點樣。大家嚟幾個地方買完嘢就冇喇，但香港仲有好多好可愛地方。做呢樣東西係需要好多資料搜集，否則好多嘢就好表面化，冇意思。我依家睇到好多香港嘅新導演都好出色。我都係覺得大家唔需要用一種好悲哀嘅態度去挖古仔。」張姐上年嘅作品《相愛相親》，同時入圍今屆亞洲電影大獎，分別角逐最佳導演、最佳女主角、最佳男配角、最佳女配角同最佳編劇5個獎項。
撰文：馮仁昭