【馮仁昭四圍超】同嘉穎恩愛賀契仔百日宴陳凱琳唔受催婚

【蘋果日報】賴慰玲同老公梁子峰前日為囝囝Marat搞百日宴，契媽陳嘉寶（Anjaylia）、陳凱琳同契爺鄭嘉穎當然有出席啦！媽咪賴慰玲好緊張，親自設計蛋糕送畀囝囝，有晒設計圖，仲搵埋契媽陳嘉寶同陳凱琳一齊幫手，分工合作，非常認真整蛋糕，製成品仲做得好靚！而陳凱琳噚日亦有喺Instagram貼出同賴慰玲、陳嘉寶嘅合照，留言祝福契仔Marat，每一日都健康強壯，又話Marat好有福，因為喺生活中擁有關愛自己嘅人。
湯洛雯寄情工作
另外，陳凱琳噚日同黃智賢、湯洛雯等喺馬鞍山出席宣傳活動，佢同黃智賢上台玩遊戲時，要同黃智賢擺出情侶甫士，黃智賢乘機講笑話個甫士係跟鄭嘉穎學，搞到陳凱琳作狀喊打佢。講到前日出席契仔百日宴，陳凱琳爆料話賴慰玲親手做蛋糕時感動到眼濕濕。但有網民留言催佢同鄭嘉穎快啲結婚生小朋友，陳凱琳即刻耍手兼擰頭。而同場湯洛雯啱啱同羅天宇分手，四年情玩完，湯洛雯話：「我唔習慣公開私人感情，所以冇公開分手件事，不過後嚟牽涉到其他人，所以至會講。」佢強調分手唔涉及第三者，係大家嘅感情出問題，依家會專心工作，未準備接受新感情。
撰文：馮仁昭