詩詠稱好了解男人C君爆笑：到底死咗嗰個係邊個

【蘋果日報】嘟姐同農夫之前主持旅遊節目睇到觀眾爆笑，之後佢哋主持《Do姐有問題》，近日播出唐詩詠同馬國明嗰集，唐詩詠竟然語出驚人，佢同C君討論一間旅舍會送咩俾客人，佢哋要用提示，咁唐詩詠同C君要摸箱中嘅物件係乜，當C君伸手入去時，唐詩詠就話：「你入先喇。」C君即意有所指，搞笑咁叫唐詩詠唔好講嘢，驚成集要剪晒，之後佢哋繼續討論，唐詩詠答係眼罩，嘟姐話方向啱，陸永笑住講：「唔係眼罩呀!都係罩。」唐詩詠望一望C君忽爆咗一句：「嗰啲罩冇咁細。」馬國明同陸永即爆笑。


跟住下一題就介紹首爾一個漁市場，指當地人只食雌性鮟鱇魚，問啲雄性鮟鱇魚去咗邊，個提示係「雄性鮟鱇魚消失咗」，唐詩詠忽然話：「太有信心，我太了解男人喇。」C君反問：「呢個關明白男人乜嘢事呢?」唐詩詠嗰組寫「交配完之後死咗」，馬國明就寫係「俾老婆食咗」。


嘟姐追問唐詩詠嗰組，咁即係雄性鮟鱇魚係點死，C君同唐詩詠有啲尷尬，由C君解釋：「萎縮咗，有啲嘢排咗出嚟。」唐詩詠之後話：「萎縮死!」點知俾唐詩詠估中，後來嘟姐都為唐詩詠解釋：「佢係好女仔嚟，但係佢更需要再了解多啲雄性，先至再去拍拖。」


鏡頭最尾又再播C君講：「呢個答案係經唐詩詠對於男人好有了解而得出嚟。」畫面見個答案牌寫住「交配完之後死咗」，之後陸永抽水講：「個人經驗。」唐詩詠接住話：「係囉!死鬼咗。」C君笑到面都紅埋：「係囉!到底死咗嗰個係邊個呢?」唔知佢哋講緊嘅係詩詠舊愛洪永城定係崔建邦呢!?