「風之后」珊珊南灣豪宅轉即供

【明報專訊】「風之后」李麗珊早前與家人斥資1686.8萬元，買咗新地（0016）牽頭發展嘅鴨脷洲豪宅「南灣」一個1300多呎、面向深灣遊艇會海景一房單位作投資用途，折合呎價1.26萬元。有地產界人士向小琴報料，話珊珊同家人，較早前已由建築期付款改為即供，咁即係將層樓孭上身。假設珊珊等畀三成首期，即約500萬元，以拆息按揭約0.8厘計算，分20年供，月供5.3萬元，佢地三姊妹一齊供，即每人月供約1.8萬元，應該綽綽有餘啦。

南灣預計完工日期本來係今年3月底，即如不延期，約5月左右收樓，現時轉即供，當然係有着數啦。根據田土廳反映，珊珊是於政府提出額外印花稅前，已決定轉即供，樓價獲減16.87萬元至1669.93萬元。

李麗珊、李麗然、李麗萍3姊妹，以分權共有（Tenant in Common）嘅方式，各佔業權三分之一，購買南灣豪宅。早前珊珊丈夫黃德森向小琴表示，該豪宅唔會作為佢一家4口嘅新居，並笑言「無咁本事，未搞得掂兩個女」。