實力建業賣徐悲鴻名畫勁賺

【明報專訊】好多上市公司都會購入藝術品作為投資，好似匯豐控股（0005）就擁有19世紀畫家錢納利（G. Chinnery）嘅收藏，而華置（0127）主席大劉劉鑾雄更是出了名愛好收藏藝術品，經常去拍賣行揀心頭好。現時市場資金咁充裕，買藝術品都不失為一個投資良方，皆因轉個手賣出去分分鐘賺唔少㗎。

好似主要業務為度假村及物業發展嘅實力建業（0519），噚日就公布喺佳士得安排嘅公開拍賣中，賣出一幅國畫，總購價為1300萬元，喺1998年實力建業用34.5萬元買入，事隔12年，幅畫已經升值37倍。扣除相關嘅佣金及開支，實力建業將會錄得收益1200萬元，會用作集團嘅營運資金。

今次出售嘅國畫亦大有來頭，係現代繪畫大師徐悲鴻喺1944年時完成嘅《雙豬圖》，好多人都知道徐悲鴻以畫馬著稱於世，藉以抒發佢鬱結難言之悲憤和愛國憂世嘅心情，佢筆下有好多幅駿馬圖，但係畫豬就比較少有啦。