去年十月未甩拖？黎明女友EX同前夫都好有米

【蘋果日報】黎明就快做爸爸，此消息經過黎生確認後，唔少fans都嚇到跌咗個下巴落嚟咁滯。
黎明一向都好鍾意小朋友，今次女友Wing為佢陀B，自然開心到不得了。本來深閨嘅黎明，變得更深閨，專心在家照顧Wing，一齊迎接小生命來臨。
關於Wing嘅背景，連日有不少報道，最為人知係佢曾經做過李治廷助手，以及話佢喺公司呼風喚雨咁啦。昨日有周刊仲披露咗Wing嘅情史，同佢上位之路添。成個故事夠晒曲折而且傳奇，令人歎服。
報道指，Wing同黎明拍拖之前，曾有一段婚姻；離婚後，又有一段戀情，對象據知都係富二代。
一向對感情事三緘其口嘅Wing，絕少向同事講自己私生活。有指Wing前夫係太子爺，屋企係做飲食生意嘅。佢當年加入A Music時已經係人妻，有啲相熟同事略知佢老公係有米之人，仲笑佢賺銀買花戴。但佢幾時結婚同離婚，就冇人知。
離婚後，有指Wing同車行富二代Vincent拍拖，去年十月仲一齊出席周國賢細妹婚禮，但當時是否已分開就不得而知，估唔到依家變成為黎明陀B，發展得真係好快！