同豹嫂慶祝結婚十周年「愛妻號」豹哥：真係冇後悔

【蘋果日報】「豹哥」單立文同胡蓓蔚前日慶祝結婚十周年，當年係由豹嫂倒追豹哥、又主動提出結婚，豹哥都係一口答應，喺2008年拉埋天窗，二人相愛21年，豹哥一直好錫老婆，連胡說八道好姊妹都知豹哥係愛妻號，好縱容豹嫂。
兩公婆前晚喺中環太子大廈一間餐廳食飯，仲有李施嬅做電燈膽，豹嫂喺IG貼出合照，佢話自己冇為意由第一次拍拖時，老公已經寵壞佢，直至好朋友同佢講，豹嫂先留意到，豹嫂講出老公嘅優點，每次去旅行，豹哥都係問老婆想去邊，又會讓豹嫂決定去邊間餐廳食嘢、大家睇邊一套戲，豹嫂煮完飯，豹哥一定會洗碗碟，又會任由豹嫂控制屋企個電視搖控，成日聽豹嫂抱怨，講完豹嫂都覺得自己幸運。
而豹哥先貼出結婚相喺IG回覆：「10年前的今日，好多人都見證咗我做老襯。」更打hashtag講「其實結婚真係冇事嘅」、「10年人事冇翻身」，認真搞鬼，之後再貼二人合照，佢話自己10年前喺唔清醒嘅情況下做咗一個決定，不過人不marry枉少年，佢真係冇後悔。
至於，做咗成晚電燈膽嘅李施嬅都有貼出豹哥兩公婆嘅相，祝佢哋十週年快樂，永遠保持搞笑嘅甜蜜，仲叫豹哥繼續寵壞豹嫂。