林嘉欣：好掛住哥哥嘅笑容

【蘋果日報】張國榮逝世15年，劉德華、林嘉欣和古天樂等細說對哥哥的感受，一起緬懷這位一代巨星。
林嘉欣：照顧新人
「好掛住哥哥嘅笑容，好掛住即使好簡單嘅慰問『合群啲呀！』有時去啲唔適合嘅場合好似同高層食飯，佢會主動話車我返屋企，照顧我呢個啱啱出道嘅新人，車我冇人會投訴，好貼心。」
劉德華：活在心中
「眨吓眼好快就15年，哥哥離開咗我哋已經一段時間，好多喜歡佢嘅人都仍然覺得佢留喺我哋心裏面，希望趁呢個時候同大家懷念一下哥哥，希望佢喺第二度都幸福快樂。」
關之琳：佢好錫我
「同Leslie認識係我第一部電視劇開始，嗰時完全唔識演戲，佢幫咗我好多，後來大家做咗朋友，佢好錫我，最掛住佢叫我把聲。佢唱歌特別有味道、有感情，我覺得佢仲喺度，只係去咗旅行。」
古天樂：陪伴成長
「哥哥畀我最深刻嘅就係佢以往一切啲歌啦，上兩年我同古巨基都翻唱過一次《當年情》。佢啲歌嘅歌詞，可能我係80年代長大，所以佢啲歌係陪伴我成長，嗰個意義特別深刻。」
張智霖：學好牌品
「我係哥哥嘅打牌腳，喺佢度學到好牌品。記得喺哥哥屋企打牌食飯，發覺佢對佢工人好好，問佢係乜觀念？佢話有時唔係要鬧死人，係要冧死人，我覺得好受用，學到對任何人都咁一致嘅態度。」
謝安琪：舞台瀟灑
「哥哥有一樣嘢係其他人好難模仿，佢嘅最高境界係佢嘅一份瀟灑。我覺得佢喺舞台上面揮灑自如，心態好瀟灑，係好難而且好有型，唔同階段嘅哥哥都有唔同美態同吸引力，最令我懷念。」
劉美君：細個就識
「《風繼續吹》係我對哥哥最深刻嘅歌，最惦念哥哥好nice，我細細個就識佢，臨決定移民離開娛樂圈前喺酒店樓下見到哥哥飲緊嘢，佢攬住我叫我好好保重，好記得嗰種哥哥對妹妹關懷之情係點樣。」
薛凱琪：樣樣都掛
「我最掛住哥哥……其實真係講唔到一樣嘢，我掛住佢嘅電影、佢嘅歌曲，我掛住佢嘅訪問，我掛住佢嘅自然，每一方面哥哥嘅嘢，我都好掛住。」
黎瑞恩：做戲好好
「我唔唱歌嘅時候哥哥復出番，我哋冇見過面，但我由細聽佢啲歌長大，佢做戲非常好，我睇佢演唱會非常開心，佢收放自如，係超級巨星，亦係我兒時偶像。」
採訪：馬建華、羅慧敏、張俊銘、盧妹、黃曉妍