傭人黑面Bob嫂嬲爆：好似我餵毒藥咁

【蘋果日報】林盛斌（Bob）生咗三個女，去年終於追到個仔，剛滿7個月大嘅囝囝林道申（Jaye/四少）日前入院，搞到一家人都好擔心。
Bob前日透露Jaye已經出院喇，一直陪伴喺Jaye身邊嘅媽咪Pearl都有啲身心疲累，喺facebook寫咗段千字文，講番囝囝入時候遇上重重波折，因為好多醫院都爆晒，幾經艱苦先搵到一間醫院接收，最後被診斷患上「人類間質肺炎病毒」。
Bob嫂透露囝囝發咗四日燒，由於冇指定抗生素可醫治，所以只能靠四少自己努力。Bob嫂每晚唔瞓都要照顧個仔，佢話幾辛苦都唔緊要，最嬲係身邊人黑面，但講緊嗰個唔係佢老公，Bob嫂﹕「我每次餵四少食藥，個BB喊到拆天，個工人塊面黑到我好似餵毒藥咁，算點先？唔幫手都唔好影響我心情啦﹗我晚晚自己照顧到天光㗎大佬。」不過，佢嘅EQ都好高，話做人要有好心情、好思想同做好事嘅三好精神，咁所有事都能夠輕鬆過去。