陳美齡榮升奶奶擺烏龍家姐因乜事赤腳影大合照？

【蘋果日報】陳美齡（Agnes）嘅大仔金子和平與美籍台灣女友莊文若，前日喺中環一間高級私人會所筵開16席，廣邀親朋好友。陳美齡曾被傳出任教育局局長，前晚前特首董建華同曾蔭權都有俾面出席，但就未見梁振英及現任特首林鄭月娥，而陳志雲、岑建勳、劉天蘭、DJ夏妙然、陳復生等亦為坐上客。
有指該高級私人會所列明不能穿牛仔褲及波鞋，據知有少賓客都着錯鞋被指犯規，就連陳美齡嘅姐姐陳依齡都唔例外，着咗一對白底鞋，原來都係唔合格，影大合照時唯有赤腳上陣，佢仲向現場朋友呻﹕「着錯鞋！」最終未食飯就陪94歲媽媽先行離開。
婚宴上，新任奶奶陳美齡都烏龍百出，當阿仔用日語講新婚賀詞時，媽咪陳美齡充當英文翻譯員，但疑太緊張搞到唔知自己講乜，全場哄笑。而一對新人未切蛋糕，陳美齡又叫大家食嘢，但聽到阿仔話會計劃造人，陳美齡就笑得最開心，不停拍手。