【馮仁昭四圍超】周迅《如懿傳》內地廣電局放生

【蘋果日報】周迅同霍建華主演嘅內地劇集《如懿傳》，上年5月拍完後，原定安排喺12月播出，但送審期間俾廣電局打回頭，遲遲唔可以出街。除咗《如懿傳》之外，其他宮鬥劇一樣冇得播，例如范冰冰主演嘅《巴清傳》（前名《贏天下》），陳喬恩嘅《獨孤皇后》都唔畀播。不過，噚日有報道指上述劇集已俾廣電局放生，前日廣電總局公佈「2017第四季度電視劇發行許可情況」，呢幾齣劇集已經得到發行許可證，但幾時可以播出，投資公司就未有表態。
賣海外播映權
《如懿傳》嘅投資公司新麗傳媒同騰訊，投資約10億人民幣拍攝，單係主角周迅同霍建華就用咗2億5千萬人民幣。所以投資公司一直好努力爭取發行許可證，寧願大幅度刪剪迎合廣電局要求，終於攞到許可證。
有指《如懿傳》投資公司早就諗定最壞打算，假如最後都唔可以喺內地播出，就會賣播映權畀海外公司喺網上播。雖然可以收番海外版權費，但外地唔及內地市場大，始終會蝕本。
撰文：馮仁昭