悔講「剎那光輝唔代表永恒」蔡楓華：我過錯咗TVB

【蘋果日報】蔡楓華、陳秀雯、李龍基及劉雅麗等前晚在灣仔伊館擔任「真．經典電視主題曲演唱會」嘉賓，李龍基及劉雅麗分別唱出《儂本多情》、《心債》及《明星》等歌曲，懷念逝世15周年的張國榮（哥哥）和梅艷芳，場面感人。劉雅麗感慨道：「哥哥同梅姐走咗15年，但我冇忘記過，佢哋已經變咗天上嘅星星。」
稱掹張國榮車邊
蔡楓華自言百感交集：「1986年，我喺伊館開過6場騷，當時喺麗的拍完《我要高飛》後，就過檔TVB，感覺好光榮嘅，不過我過錯咗去TVB，因為整咗個《勁歌金曲》畀我，如果我繼續喺麗的，就唔會出咗『剎那光輝唔代表永恒』呢件事。其實蔡楓華唔只識唱歌，仲好幽默，啲人話『剎那光輝唔代表永恒』令我走下坡，其實錯晒囉！有個巨星畀我掹到車邊，嗰個就係張國榮先生。」
蔡楓華受訪時，自言感觸良多：「我絕對係掹哥哥車邊，啲人話『剎那光輝唔代表永恒』係揶揄哥哥，其實唔係，大家知今日（前日是哥哥死忌）係乜日子。當年我拍劇，哥哥教我術語、又教我打snooker。我要澄清，我唔係成日講陳百強、阿梅同哥哥去增強自己，我哋年少時真係好friend，嗰時我哋成日去跳舞去玩，加上我又係《勁歌》主持，基本上講得出嘅歌手我都識，鄧麗君嗰時都成日同我去跳舞㗎。」蔡楓華不斷緬懷昔日風光的同時，又說好後悔當年沒有向影壇發展：「依家冇人會搵我，我係歌星，視劇界嘅前輩，希望大家支持粵語歌，我都想開演唱會。」
陳秀雯唔敢催婚
此外，久未在幕前演出的陳秀雯，坦言心情緊張。她又提到現年30歲的兒子，她說：「生得靚㗎！佢依家30歲，有自己事業，唔會入行。」何時飲新抱茶？陳秀雯笑說：「我再講佢，返到屋企會同我反枱。」
採訪：盧妹
攝影：林賓尼