同劉浩龍半年前分手Joey搬竇掃兩億獨立屋

【蘋果日報】Joey同劉浩龍拍拖5年，起初Joey唔介意人前晒恩愛，講過想40歲前結婚，愛得大方，不過近排一時傳「借分手為劉浩龍演唱會宣傳」、一時傳「Joey心淡講分手」，Joey出席活動時未有否認分訊，只係叫大家俾啲空間佢哋，昨日有報道指Joey同劉浩龍半年前已分手，不過Joey重情義，為咗保護前度，唔想人哋以為佢哋用分手做宣傳，先絕口不提。
據報道稱劉浩龍同Joey熱戀期嗰陣，劉浩龍不時喺Joey位於司徒拔道嘅豪宅出沒，不過分手後，Joey搬咗去市值兩億嘅淺水灣獨立屋住，年頭一班好友去霆鋒屋企開餐，Eason、阿徐、舒淇同君如等在場，劉浩龍同Joey同場都有啲貌合神離，跟住Joey一個人去咗日本獨遊療情傷，此外，報道又指劉浩龍為呢段感情努力過，當初唔想俾人哋話佢使女人錢，堅持AA制，不過Joey係圈中富婆，又係樂壇天后，工作壓力大，當然想出外旅行減壓，Joey平時坐商務，如果同男友去旅行，Joey就轉坐經濟位，點知據Joey閨密向周刊指，出遊太多對男方嚟講都係一種負擔，容媽唔想愛女屈就，加上生活方式夾唔嚟，Joey最終斬情絲。