陳豪、茵媺平民拍拖　唔預子女

【蘋果日報】【爆相爆片】陳茵媺（Aimee）喺愚人節踏入37歲，生日前夕嘅慶祝節目，原來係同老公陳豪拍拖行傢俬店，享受平民夫妻樂，當日被讀者鄧太透過「爆相爆片」分享溫馨畫面。
鄧太喺電話表示：「嗰日下晝1點半，喺沙田嘅IKEA見到陳豪同陳茵媺，佢哋買咗幾袋嘢，仲行咗去櫃枱同職員訂咗啲貨，之後就排隊畀錢。」由於唔少人認得陳豪夫婦，鄧太話佢哋都冇乜親熱動作：「拖手都冇呀，畀完錢就由陳豪負責拎晒啲嘢，跟住就走咗。」
招牌髮型易認
從讀者提供相片所見，Aimee戴cap帽化淡妝，陳豪就着短褲戴口罩，但紮咗辮仔嘅招牌髮型，就出賣咗佢嘅身份，令人一眼就認出。至於身為三子女媽咪嘅Aimee，正日生日就喺社交網分享收到大小情人送花，甜蜜蜜透露老公喺屋企整咗好多氣球，晚上仲食日本新鮮空運魚生，Aimee話老公可以全日陪自己，就係最好嘅生日禮物。