新聞類別
財經
詳情#
【明報專訊】喜歡睇戲嘅小琴每次見到帝國大廈，就會諗起毛茸茸嘅大猩猩，捉咗一位靚女爬咗上去睇日落，之後仲殉埋情，幾咁浪漫淒美！其實102層高嘅帝國大廈本身都係建築經典、紐約地標，1930年起嘅時候只係用咗14個月，係世界七大工程奇蹟之一，同英法海底隧道齊名。
噚日小琴就留意到一單消息，原來呢幢有80年歷史嘅文物呎租貴過中環IFC 2期多多聲，《紐約郵報》引述消息話，由馮國綸、馮國經兄弟掌舵的利豐集團，同業主傾咗超過半年終於都落實租用帝國大廈寫字樓，每呎租金介乎40至50蚊美金，以之前傳過嘅45蚊租金作為參考嘅話，每呎租金要成351蚊港紙，足足比家大約租緊200蚊一呎嘅IFC 2期貴一大截。
報道話利豐租用的面積達49萬呎，好誇張，因為相當於21層IFC 2，用呢條數計，一年租金支出要成廿幾億港銀，利豐有冇必要租咁多地方？唔知有冇搞錯粒數？
雖然利豐租帝國大廈的確唔係平，不過最令小琴覺得有趣嘅係《紐約郵報》早前搵咗個鬼佬風水師睇過帝國大廈嘅風水，風水師講到明話帝國大廈西面會起嘅一幢67層高嘅大廈，到時會影響帝國大廈嘅風水。不過，一向都幾信風水嘅利豐董事總經理馮國綸都夠膽租嘅話，小琴諗風水差極都有個譜，何况要係紐約搵成50萬呎嘅樓面邊有咁容易！
報料電郵﹕piano@mingpao.com
回應 (0)
