【金像獎前哨戰】鄧麗欣毛舜筠周秀娜　爭影后獨白

【蘋果日報】香港電影金像獎今晚舉行，各大獎當中，以最佳女主角競爭最為激烈，五位候選演員當中，只有毛舜筠、鄧麗欣和周秀娜未曾奪得影后，而鄧麗欣和周秀娜更是首次獲得影后提名。我們找了三人做訪問，看看她們賽前有甚麼內心獨白想發表。
周秀娜
「好多人話，女人年紀越大，條件越細，條curve會一路咁鏟落去。30歲係女人嘅心理關口。
但我，唔係咁睇。
女人到咗30歲，人生歷練會令佢成長，令佢明白女人唔一定用美貌去換取事業。尤其係演藝事業。
要演好林若君嘅內心爭扎，當然唔容易，要改變觀眾對演員嘅偏見，其實更難。
好慶幸自己呢幾年嘅付出都有回報，與其話女人30係一個危機，不如話香港嘅女演員更加需要發揮空間同埋機會。
希望觀眾可以多啲支持香港電影，鼓勵年輕女演員。
請支持我，我係周秀娜。」
毛舜筠
「我諗都有一段幾長嘅時間，冇拍過咁一部咁嚴肅嘅電影。
要演繹一個患有自閉加中度智障仔嘅媽媽，我哋係用咗好多時間同埋好多心機去做research，做好多密集式家訪，睇好多錄影帶。
演好黃金花呢個角色，實在係唔係一件容易嘅事，但比起好多患自閉症細路仔嘅家人，其實呢啲係微不足道。
或者我哋忽略咗呢小撮人，唔明白佢哋嘅感受。
比起得獎，我更希望將關懷弱勢嘅訊息，透過電影傳揚出去。
我係毛舜筠，請支持我。」
鄧麗欣
「遇到《空手道》呢部戲，可以話係我嘅幸運，我得到好多認同，換嚟好多祝福。
最幸運嘅係，我之前十幾年嘅努力，終於被認同。
冇當日嘅阿寶，又點會有今日嘅平川真理？
呢部戲令我體會到，無論之前遇到幾多難關，受到幾多批評，你都要好似平川真理咁，企番起身，勇敢面對。
或者好多人對我好有信心，但我無時無刻都要記住，我一定會遇到比我更強大嘅對手。
我係鄧麗欣，Arigato gozaimashita。」
採訪：陳杰、馮國康、何永寧、Sapna
攝錄：馮峰、Neo、馮嘉銘
攝影：仇志德、陳俊強、陳慧安
周秀娜
髮型：Amber Tse@Queens Private I
化妝：Circle Cheung@ndnco.co
服裝：Versace
場地：PLAY HKPOP
毛舜筠
服裝：Giorgio Armani
場地：SL iBuddies
鄧麗欣
髮型：Euling Chow@ IL COLPO TST
服裝：SPORTMAX、Nike
場地：FFG武術健身中心