前As One成員Chloe拍復刻廣告　網民批男主角太「成熟」

【蘋果日報】陽光出復刻版已經係好耐之前嘅事，復刻廣告去年4月出咗個，將鄭伊健個version以一樣拍攝手法翻拍，男主角由鄭伊健變李拾壹；女主角由Yvonne Yuen變陳蕾。效果係，負評居多。網民指最大問題係選角錯誤，陳蕾亦做唔出嗰種純情暗戀feel，感嘆集體回憶被破壞。中箭嘅李拾壹結果喺fb出post寫道：「笑下啦香港人，鬼唔知我唔係鄭伊健咩，我姓李0架！」咁廣告商要「刺激」大家集體回憶，大家都係好被動0架咋…
一年之後，呢個品牌又再「挑機」，前日推出「80年代陽光經典廣告歌Sol#4，仲同Chloe將你我嘅初戀甜蜜，以浪漫邂逅愛情故事，帶你返去嗰個美好年代」。廣告特登用4:3同扮低清（有得揀1080p），女主角係前As One成員Chloe（蘇皓兒）。不少人都讚Chloe似周慧敏，就連佢反手拎住盒飲品（好明顯只係為騷牌子）都留意到。至於男主角，係Dear Jane嘅Tim（黃天翱），即係楊洛婷老公，Dear Jane仲一手包辦演出及翻唱主題曲。
成個復刻廣告MV用心經營，營造青春懷舊Feel：Roller場、牛仔褸、gameboy、圖書館，同埋扮卡拉OK出字幕（字款更是畫龍點睛）……但忽略咗最重要嘅嘢，就係選角。因為Tim個樣，好似「成熟」得滯，一啲都唔young，反而有啲似怪叔叔。所以不少網民喺品牌官方fb留言，都係話：「個男主角係唔係大年紀咗啲吖？」、「成班中男扮少男……係唔係因為sell『復刻版』而要玩『扮當年』？」咁都有啲道理嘅……
畢竟Tim都36歲，要佢夾硬扮九十後（女主角Chloe今年24歲），真係為難咗Tim。再睇番Dear Jane四位成員，最後生嘅Nice（黎俊華），都31歲啦。Tim昨午以短訊回覆《蘋果》謂：「我都睇到，都幾多noise！我哋的確係30幾，而Chloe係20幾，你估我哋唔知咩，哈哈！到最終個廣告都係想帶啲開心同歡樂畀大家！」
Tim又稱網民咁多迴響，其實睇到呢個品牌代表咗香港人有幾多深刻嘅回憶：「咁當然整個廣告idea係想拿捏復刻懷舊嘅感覺，想分享一啲當年未見過或未感受過呢種『邊度都有陽光』嘅情懷。我見到其實都有好多人覺得好好笑，帶起咗回憶，當然亦有人喺片入面搵唔番以前嘅感覺。」
Chloe喺電話力撐Tim：「我又唔覺得阿Tim成熟得滯，因為拍嗰陣時同佢對戲都好和諧好舒服，有一幕係我望住佢夾band，佢好有魅力。至於話我似Vivian，我係好開心嘅，因為佢係公認玉女掌門人，我都好鍾意佢，其實因為廣告造型、導演拍法同道具幫咗我哋好多，似番嗰件事。」
btw，一個當年咁成功嘅廣告，留喺觀眾心目中幾十年，點解要拍一個復刻版去破壞佢呢……真心唔明。更唔明嘅係點解王宗堯個個女朋友都咁靚0架——Chloe咪就係佢女友囉！