馬思純患帶狀疱疹：臉部甚至頭皮都相當不適

【蘋果日報】30歲大陸女星馬思純昨日喺微博貼出一張素顏自拍相，佢戴住眼鏡、皮膚白皙，不過面上明顯見到一撻撻紅斑，原來佢患帶狀疱疹，俗稱「生蛇」，佢留言「頭皮是疼的，臉上是癢的，淋巴是腫的」，馬思純表情不舒服，自拍後將呢張相傳俾工作人員，稱患帶狀疱疹，臉部甚至頭皮都相當不適，透露可能影響近期嘅工作安排。
馬思純年僅7歲便參演首部電影《三個人的冬天》，13歲演電視劇《大宅門》，四年前主演蘇有朋執導嘅《左耳》入圍金馬獎最佳女配角，前年拍電影《七月與安生》與周冬雨一齊奪第53屆金馬獎最佳女主角。
生蛇是由水痘帶狀疱疹病毒引致，患者兒時感染水痘後，病毒藏喺神經線內，待長大後，病毒再度活躍引致生蛇，年紀大、免疫力弱、壓力大、糖尿病或癌症患者較易生蛇，受病毒感染部位初時會有痕癢及如針刺般疼痛感，繼而出現腫脹、紅疹及帶狀嘅水疱。