周杰倫晒愛女正面相 昆凌呷醋：被取代了

【蘋果日報】天王周杰倫同昆凌生咗大女小周周(Hathaway)同囝囝Romeo，姊弟樣一直未曝光，昆凌早前罕有晒小周周正面相，昨日周杰倫喺IG貼出囡囡全身相，小周周戴帽同黑超，着闊身衫配黑褲，赤腳喺地板行，擺出搖滾手勢，留言：「Let’s rock!妳負責在旁邊幫我加油。」，見周杰倫有打hashtag「鬥牛」，加《鬥牛》歌詞中嘅一句「三分球它在空中停留」，估計周杰倫唔係打三對三鬥牛賽喇，應該係周杰倫準備唱《鬥牛》俾囡囡聽。
囡囡之前聽歌成日聽到好陶醉又搖晒頭，咁鍾意聽爸爸嘅歌，應該係盡得周杰倫嘅音樂基因，難怪昆凌於IG留言稱自己「被取代了」，而網民笑「老婆大人吃醋」、「女兒也要學周董打球配毛帽」。不過講就咁講，昆凌又點會嬲嬲呀，昆凌之後喺IG貼咗一張周杰倫抱女相，囡囡表情多多，對住媽咪嘟嘴仔，認真得意。