新聞類別
財經
詳情#
【明報專訊】凡人總有煩惱，超級富豪都有「富豪的煩惱」（雖然小琴好難體會）。佢哋嘅煩惱，主要係如何和諧地分產，以及如何抗衡「富不過三代」嘅宿命。但唔緊要，香港嘅富豪們，從此你哋唔使驚、唔使怕，因為你哋嘅煩惱，會有專業人士同你分擔，事關瑞銀會响亞太區成立「家族服務部」，專責服侍你哋嘅尊貴需要。
家族服務部其實响歐洲好盛行，主要係針對「超高淨值」客戶，但並非協助佢哋投資，而係幫佢哋規劃財富、做家族顧問、同埋統籌慈善捐獻等。家陣環球資金由西向東移，亞洲區富豪愈來愈多，根據BCG嘅全球財富報告，亞太區（不計日本）嘅財富增長速度，遠高於全球嘅財富增長速度，預期亞太區財富佔全球財富嘅比例，會由2009年嘅15％，增至2014年嘅20％。
瑞銀超高淨值客戶服務部亞太區主管盧彩雲表示，响香港同新加坡設立家族服務部，正正係因為有見環球財富將逐步聚集亞洲，區內好多人都需要專業人士，幫佢哋規劃財富。盧彩雲話，佢哋嘅服務宗旨，係希望令「超級淨值」客戶嘅資產，得以妥善經營和延續，例如定期會組織家族成員會面，等佢哋可以一齊參與管理財富同和諧共處。家族服務部亦會協助客戶製訂長遠嘅慈善計劃，例如客戶特別想在教育或環保方面做善事嘅話，就會幫佢哋統籌，選擇最有效嘅捐獻方式同渠道等。
要有4億資產先可幫襯
以上嘅服務，係咪好貼心好吸引呢？如果閣下有5000萬瑞士法郎（即是大約4億港元）「可投資資產（investable asset）」嘅話，就有資格做「超高淨值」客戶，可以諗諗幫趁呢個家族服務部。
報料電郵﹕piano@mingpao.com
回應 (0)
