業主亂擺雜物冇王管

【蘋果日報】寶林邨發生連環縱火案，居民人人自危，有住客投訴鄰居將走廊當作私人儲物庫，即使投訴後管理處勸喻相關住客收回物品，但很快又再故態復萌，擔心影響走火安全。
管理處僅能勸喻
有區議員稱部份出售公屋或居屋住戶無懼法團出禁制令或釘契，堅持放個人物品出門，業主立案法團只能派管理員多加勸喻。
居住30年的英姐稱，不時見鄰居將單車、鞋架擺放門口，連衫亦放於走廊晾曬，「行過走廊都覺得阻住！」其他樓層亦有同樣情況，管理處間中會派人勸住戶收回物品，惟對方「保安叫拎返入去，轉頭拎返出嚟」。另一居民夏伯稱，見有住戶將鞋架單車擺出走廊，曾向房署投訴，結果「從來無見人清過，啲嘢照擺，點知幾時燒到我哋個層！」
西貢區議員何民傑指，公屋扣分制對擺放雜物出走廊的行為較有阻嚇性，一旦扣滿分便踢走租戶，反而居屋或租者置其屋的住戶自恃業主身份，無視個人物件不能擺放門外要求，業主立案法團只能派管理員勸喻，情況持續或透過民事起訴出禁制令或直接釘契，效用成疑。他指受縱火事件影響，消防昨亦派人到彩明苑其中一個常遭投訴亂放雜物於走廊的單位巡視，成功勸住戶收單車入屋。
■記者黎家駒